隔牆有耳：風雨蘭會址曝光

香港蘋果日報 2011.09.26

風雨蘭喺廣華嘅神秘會址曝光，設輔導室畀受害人畫畫紓緩情緒。

專門輔導性暴力案受害人嘅志願機構「風雨蘭」，唔經唔覺已成立咗十多年。風雨蘭為受害人提供由輔導，到驗傷、落口供「一站式」服務，佢哋嘅會址一直係高度機密。但因為廣華醫院重建，佢哋要搬家，喺上周六搞咗場回顧十年風雨嘅聚會，機密會址終於曝光。中心內有驗傷設施，亦有輔導室畀受害人畫畫紓緩情緒。
風雨蘭出名幫到受害人，但因為敢於批評政策不善，所以一直得唔到社署撥款。喺 07年，風雨蘭一度因為馬會停止撥款，差啲要停止運作，後來得到公益金接手幫助，先度過難關。不過風雨蘭前總幹事吳惠貞好記得，喺社署封殺得最勁嘅時候，試過一個月收到小市民 70萬捐款。一直有幫風雨蘭手嘅張超雄就講笑話，可能風雨蘭改壞名，所以有咁多風風雨雨。